شارع جانبي

فكرت كتير في عنوان لهذا الكلام خصوصا لاني من الثورة – اللي لسه مخلصتش بالمناسبة- لم أكتب … و دي مش وسيلة لاعتراض ولا اعراض اكتئاب و لكن زي ما تقولوا كده كتير بيبقي جوانا و بيدور في دماغنا كلام و أفكار كتيرة بتتدفق بشكل رائع و مرتب لدرجة ان من كترها منعرفش نطلع حاجة منها و تبقي النتيجة في النهاية …. زيرو.

اللي حصل النهاردة صادف انه حصل و انا في طريقي الي مكان يدعو للتأمل و اخراج افكاري فيه واحده واحده .. لكن بما انه لسه حاصل طازة فضلت حكايته برضه و هو طازة.

كنت أمر بأحد الشوارع الفرعية بالمهندسين محاولة للهروب من الزحمة و اذا بي ادخل هذا الشارع الصغير جدا اللي فيه مدرسة كبيرة جدا فيها عدد رهيب من الطلاب و المدرسين بسياراتهم الكتيرة برضه اللي دايما بتركن أمام المدرسة .. و بالتالي مفيش فرصة قدام المرور الا انه يحول الشارع ده الي اتجاه واحد و الا شكرا … هيبقي ميدان رمسيس المصغر و أكثر تعقيدا شويتين .

تذكرت اني كل مرة امر من الشارع ده اكون من غير العربية و الاقي عشرات العربيات اللي داخلة عكس علشان تنجز و تختصر الوقت كتير كنت بوقفهم و اتكلم معاهم و منهم اللي بيستجيب و يعتذر و منهم اللي “فاكس”.. ساعتها كنت بتمني اني يكون معايا العربية علشان أقفل عليهم و تتراكم ورايا العربيات و ميبقاش قدام المعاكسين غير فرصة الرجوع مع ذكري سيئة تخليهم يفكروا و لو مرة قبل ما يقرروا يدخلوا – علي الأقل الشارع ده- عكسي .

المهم .. المرة دي حظي السعيد -أو التعيس مش عارفة- كان معايا العربية و لسه بفكر انه لو حد جه عكسي هقفله ولا ايه؟؟!! وجدت هذا الكائن الطفيلي يداخل بالعربية بسرعة طريق مصر اسكندرية و انت قبل الساحل بعشرين كيلو و هتموت و تشوف البحر …. يدخل كالتنين الهارب بهيكله -اللي هو العربية طبعا- من علماء الحفريات و هووووب فرمل وشي في وشه  و كانت البداية.

نظر لي نظرة ايه فيه ايه

رددت عليه بالاشارات : الطريق ده اتجاه واحد انت كده عكس

ظهر رجل محترم جدا في سن والدي و يضحك ضحكة المنتصر و يقول لي : ايوه كده .. حركة أسد صحيح.. دول بهدلونا في الشارع … فعرفت انه من سكان المنطقة

أما أخينا التنين نظر لي نظرة بلهاء بابتسامة تحاول ان تقول : اه انا جنتل مان و هعديكي ثم ضرب المارش دارير و رجع للوراء و شاور لي ان أمر .. ثم تحولت النظرة البلهاء الي نظرة استعجاب و تتنيح عندما وجدني اشاور له مخرجة نصفي من الشباك : لأ أنا مش هعدي اتفضل حضرتك لأن ده عكسي .

بدأ يعي الموقف و نظر لي نظرة عند و شاور من داخل السيارة : لأ مش همشي و هدخل يعني هدخل .. و خلينا قاعدين .. بطلت العربية و نزلت فوجدت الرجل المحترم يقول لي : لا لا يا بنتي مش للدرجة دي خلاص سيبيه .

رددت : و لما اسيبه مين هيوقفه هو و اللي زيه عند حده ؟؟!!

أجاب : و الله والله انت صح بس انت بنت و ميصحش تقفي في الشارع كده .. لم أفهم وقتها معني كده … كده يعني ايه .. كده يعني بعلي صوتي و انادي علي الحق ؟ و لكني عذرته لأنه كان فعلا قلقا من الموقف .

رددت : لو كلنا وقفنا هو اللي زيه سواء قاصدين أو مكسلين مش هيعملوا كده تاني  .

ثم التفت خلفي لأجد ثلاث سيارات قد تراكمت فأعتذرت لهم و قلت رافعة صوتي محدش يزمرلي اللي شايفني صح ينزل يساعدني و يكلمه … لما عرفت بعد كده كانوا جميعهم في صفي و لكنهم لم ينزلوا الا واحد … نزل من الزهق لاننا طولنا …

ذهبت لهذا التنين و شاورت له أن يفتح زجاج العربية حتي أفهم وجهة نظره و أوضح موقفي فأنزل بالزجاج فقلت بهدوء : حضرتك ده اتجاه عكسي .

رد ببرود : مين اللي قال

بهدوء اللهم طولك يا روح قلت : شايف الرصيف ده بيبين لك ان اتجاه واحد غير العلامة دي غير المتاريس اللي المرور حطاها .

رد بعند : انا بدخل من هنا دايما و كده اسهل و أقرب

رددت بنفاذ صبر : لأ هو حضرتك ده اتجاه واحد و الله و الناس اللي ورايا مبيتكلموش علشان عارفين الكلام ده – فنظرت لأجد الصف زاد لاخر الشارع-

ردد بتناحة : طيب هواتجاه عكس و انا هدخل كده يعني هدخل , ما كل الناس بتمشي غلط

علت نبرة صوتي : ما هو احنا مش لازم نبقي غلط لمجرد ان ده زي الناس .. و بعدين المسأله مش محتاجة عند و لا هي مسألة كرامة .. عادي طب مانا كمان ساعات بغلط و بتلخبط و لما حد بيقول لي بعتذر و بمشي ده مبيقللش مني ده بيكبرني أكتر و …

قاطعني بجرعة مضاعفة من التناحة لم اتمالك نفسي بعدها : انا هدخل كده يعني كده و ده مش غلط

استشط غضبا و قلت : طب احنا نجيب الشرطة بقي هما اللي يفصلوا ده صح ولا غلط و عدت الي سيارتي لأطلب الشرطة و هنا اكتشفت حاجتين بيدلوا علي شيء واحد

الأولي : اني اتلخبط في رقم الشرطة و اتصلت ب 123 اسعاف بدلا من 122 شرطة ثم ايقنت ان 122 هي الشرطة فكلمتهم.

الثانية : ان  الأرقام دي مبتتحسبش علي الرصيد لأني مكانش معايا رصيد و لقيته بيتكلم عادي الحمد لله … أكيد مكنتش هروح أشحن و أسيبهم أو استلف من التنين. J

و الحاجتين دول خلوني اتفاجأ ” اننا عمرنا ما استنجدنا بالنجدة ” للأسف … و يمكن ده لأننا عمرنا ما اعتقدنا انها هتنجدنا …

أفقت علي صوت رجل : أيوه

رددت بنبرة الأفلام العربية الكلاسيكية : بوليس النجدة ؟؟!!

أجاب : أيوة يا فندم .. خير

رددت بسيل من الكلام كالحنفية : أنا في شارع كذا كذا و ده اتجاه واحد و في واحد جاي عكس و انا موقفة الطريق و رايا عربيات و هو عاند .. الخ

أجاب : اسم حضرتك و رقمك

أجبت باسمي و سألته … الرقم اللي بتكلم منه مش ظاهر عندك؟ … مش فاهمة ايه التناكة الي كنت فيها ديه بس فجأة كان نفس احس اني بكلم 911 و المفجأه انه طلع ظاهر عنده …العدد الصيني برضه فرقت كتير مع البلد ديه J

رد : حاضر هنبعتلك عربية دورية حالا

فقلت : و أنا لو مشي هكلم حضرتك شكرا .

انتظرنا و انتظرنا و انتظرنا و خمس دقائق كانت كبيرة جدا علي شارع بيمتليء بالعربيات و اللي في اخر الصف منها لا يكف عن التزمير لأنه مش عارف فيه ايه ؟

نزل بعض أصحاب السيارات ليقنعني بالتحرك و لم أفهم هما بيقنعوني أنا ليه ما يروحوا للبرنس اللي لما بصيت عليه لقيته عدل سيارته و فتح الطريق و كأنه ينتظر ان يأتي البوليس  و يجده راكن علي ناصية الشارع و يلبسني الليله … و ده اللي حاول سائقي السيارات ان يقنعوني به ..

لكني كانت حجتي الأشخاص الذين شاهدوا القصة من البداية و حتي لو سكتوا … كنت بعمل الصح و مش قلقانة من أي عواقب .

جاء احد السائقين و قال : انت مستنية البوليس .. مش هييجي .. مش هيعبرنا .. و هنقف و خلاص و احنا ورانا أشغال و ولاد .

قلت له : أنا أسفة اني معطلاكوا بس في يوم من الأيام هييجي واحد زي ده هيعطلنا كلنا في حاجات أخطر و مش هنعرف نتكلم معاه و بعدين ايه البديل ؟ اسيبه يعمل الغلط و أمشي .. الكلام ده يوجه ليه هو مش لي … الناس اللي متضايقة تروح تكلمه .. هو اللي معطلنا …

رد في اسي : ما البلد كلها خربانة .. هما سابوها تخرب

رددت : خلاص خلينا نلحق و لو حته صغيرة منها … ساعدني نحاول

فهز رأسه و ذهب هو و مجموعة من الرجال يتكلموا مع هذا التنين الساقع جدا و عادوا ليقولوا ليه انه وافق … مكنش ناقص غير اني اسمعهم بيقولوا له السكوت علامة الرضا ..

شكرتهم و ركبنا السيارات و اتصلت بالشرطة مرة اخري و انا احكي لهم اخر التطورات لأجد هذا العنيد يعطي اشارة انتظار و ينتظر ان تمر السيارات و انا اولهم حتي يعود بظهره و يدخل الشارع عكس .. علما بأنه كان وصل للشارع التالي الصحيح … تسألت في نفسي : ايه كم العند ده في الغلط و الاستماتة في اني ابلطج بالرغم من انه راكب سيارة حديثة و يرتدي ملابس نضيفة و يبدو عليه انه متعلم جدا ..

فأثارني عنده في الغلط و استعيبت اني ماعندش في الصح … فاديت انتظار و رجعت بظهري ووقفت وراه حتي لا تتسني له فرصة العودة ..

والمضحك انالبوليسكان معي علي الهواء مباشرة يحاول ان يقول لي ماذا أفعل و يخبرني انه بالفعل بعث بسيارة دورية

 ووسط المكالمة وجدت أحد السيارات اللي كانت معطله ورائي ركنت قدام و رجع يتكلم مع التنين بتاعنا حتي أقنعه و مشي ثم جاء عند سيارتي و انتظر ان انهي مكالمتي مع الشرطة و التي طالت

قلت فيها ما لم أكن أخطط لقوله : أرجوكم .. أنا و الناس اللي ورايا ضيعنا ربع ساعة أو أكتر من وقتنا علشان مش عايزيين عوج .. عايزيين البلد دي تمشي صح .. بالرغم من أي حاجة جوانا بنحاول نساعدكوا … من فضلك أنا بطلب وجود عسكري واحد يحسم الأمر عند الشارع ده و الشوارع اللي زيه… هتفرق معايا و مع ناس كتير … هنحس انكوا بتسمعونا و اننا مش بنكلم نفسنا … ساعدونا علشان نساعدكوا …. خلونا نمحي أي صورة مشوهة حتي لو انت مكنتش جزء منها … كانت المكالمة كلها رجاء و عتاب في نفس الوقت و لم يرد عليها سوي بكثير من حاضر يا فندم ..

و قفلت لأجد صاحب السيارة اللي مشى التنين يقول لي : انت صح تماما و احنا سكتنا, لكن انا رحت له قلتله “انت غلط يبقي كان لازم تسكت و تمشي و مكانش لازم تعند” ..  بصي أنا خايف انه يقدم فيكي بلاغ كاذب فأخذت نمرة عربيته .. خليها معاكي يمكن تحتاجيها … شكرته و مشيت و دخلت الشارع اللي بعده لأجد نقطة مرور كبيره  كنت ناسياها تماما فركنت و نزلت للعقيد اللي كان هناك و حكيتله القصة و من غير تتطويل طلبت منه انه يحط عسكري في الشارع ده … موضحة ان ده هيفرق معانا كلنا … هيفرق كتير .. أتأكد من اسم الشارع و اكد لي ان هيعمل ده و انا علي يقين ان ده هيحصل مش علشان واثقة فيه .. علشان احنا مش هنسكت مبقاش ينفع السكوت ..

 طلب مني اني اديله رقم العربية فرفضت و فهمته اني اخدتها علشان لوعمل لي بلاغ كاذب .. و قلتله ان مكانكوا انكوا تمنعوا الغلط قبل ما يحصل .. فخليكوا في المكان ده … و مش عايزين أكتر من كده ..التجربة دي انا مريت و بمر بيها كل يوم بأشكال مختلفة و يمكن مبتكبرش كده دايما .. بس لو احنا 10 في كل منطقة و بنعمل ده أكيد هنخلي ناس كتير تفكر و تعيد نظر..

يا كل مصري … تنحنا من تلاتين لستين سنة في الغلط … خلوقنا نتنح في الصح … و الله .. و الله …. بتفرق .

 أه و علي فكرة .. لما يحطوا العسكري .. هقولوكوا 🙂

من أول الشارع الجانبي

كانت معكم

نسمة زعزوع

نكتة سخيفة…. الي الميدان … لف و ارجع تاني

انتشرت علي الفيس بوك نكتة أخد الكثيرون يعملولها

Share

علي كل صفحة … سمعتها أول ما سمعتها من صديقة لي قبل قراءتها و ضحكت عليها…مموتش من الضحك يعني لكنها للحظات طبعت علي وجههي ابتشامة …

النكتة:

3ayel Gheles: *Enta 3ayez eih ya habibi?* hosni yemshi!
*Leih keda ya habibi * Howa keda lazem yemshi
*tab matestana lel entekhabat Eli gaya?* la2 yemshi delwa2ti
*tab ma el balad hatbouz* mesh mohem yemshi bardo
*tab netfahem* la2 ba3d ma yemshi*
… *Enta ghabi yabni?* aywa bass yemshi..
*tayeb yemshy yerou7 fean?!* ma3rfsh bas yemshy..
* tayeb yenfa3 yigy tani ba3den?!* ah bas yemshy…

من يوم خطاب الرئيس (سابقا) ايوه سابقا حيث  انني من يوم الجمعة 28-2 لم أعترف بوجوده كرئيس … علما بأنه من قبل 25 لم أعترف به كرئيس أو غيره و كنت ممن يتبعون مبدأ “رئيس جمهورية نفسي”… لأنه و ببساطة لو في رئيس جمهورية أو حتي وكالة ليها صاحب أو رئيس مكانش هيسبها تخرب و تتنكس لحد ما الضرائب تحجز عليها … طبعا مع الحمد و الشكر أن بطرس غالي معملهاش قبل ما يسيبنا ….

نرجع لموضوعنا … سبق و أن ذكرت لمن قرأ ما سبق مما كتبت أني لم أتأثر عاطفيا نهائيا من هذا الخطاب… لأن الكلمة الصادقة التي تخرج من القلب هي التي تصل الي القلب بنفس الصدق …. و محاولة الرئيس ابداء الندم و قلب الترابيزة بقوله انه من فني عمره في خدمة البلد دي … هذا الكلام لم يظهر أمامي سوي محاولة للخروج من المأزق و جعل الليلة أو السبع ليالي اللي سبقوا الخطاب … يعدوا علي خير … و من يومها لم تتوقف هذه النعمة التي وهبنا الله اياها الا و هي العقل عن التقكير و التفكر … البحث و القراءة و سماع العقلاء مع الجهلاء, المتحمسين مع المحبطين و اللي مش فارقة معاهم.

و النهاردة و أنا لا أتبرأ أو أندم علي ما قلت … فقد كنت من المؤيدين للتهدئة و لم ألم أو أعارض الرأي المعاكس و لكن أحترمته ,, و قعت أقرأ و أرتب و أحط السلبيات و الايجابيات لمغادرة أو البقاء في شعلة ميدان التحرير المنيرة … و التي لم يتخيل منادي الميكروباص في يوم عندما نادي علي خط “التحرير” انه ده طريقه لأنضف و أشرف حياة و مستقبل .

باختصار و من غير رغي علشان العين و الدماغ مش مستحملة كتير… قررت أوقف عقلي تماما أو أشغله بما يؤدي غرض البقاء علي قيد الحياة …التي أصبح لها طعم من الان و  تستحق التمسك بها …

1-     أنا راجعة ميدان التحرير .. لم أهجره فقد تركت عقلي و قلبي و مصريتي هناك منذ ان تركته.. و لكني راجعة أستردهم و أسترد معاهم حاجات كتير كلنا عارفينها … و مش هعيد و أزيد فيها .

2-     هوقف مخي… و اه … أنا العيل الرزل اللي في النكتة السخيفة اللي اتقالت في توقيت من روعته و نقاءه سخف من الدعبة .. اللي أصلا ملهاش طعم.

3-      مطلبي ان هذا الرئيس (السابق) محمد حسني مبارك يرحل و يمشي و يعمل اخر ثواب في حياته يمكن يشفعله لما يقابل اللي كلنا مرعوبين من مقابلته عز و جل.

4-     مطلبي أن الرئيس يمشي و يرحل الي الداخل…يعني يسيب الحكم و الكلام واضح…الحكم مش البلد. مش عشان حقه يموت هنا..لا..ده عشان حقنا في دم الشهداء و اموال الفقراء و كرامة المستاء…

5-     انا عايزاه يرحل و مبفكرش بعقلي…لأني فكرت طوال الايام اللي فاتت..زي ما فصل دستور علي مقاسه… يفك الخيط و يفصل توب طويل شريف مغسول بالتسبيحات و الدعوات يغطي عورة مصر اللي استباحوها طوال 3 عقود .

6-     انا عايزاه يرحل عشان يتحاكم و يتخلع ضرس العقل او الجهل اللي اتحشر في كرسي العرش لما سوس و احتار فيه الأطباء و الحكماء فرادي كانوا أو لجان .

7-     يرحل علشان لو كانت أختي أو أحد أقاربي أو أصدقائي دمه سال من 25 للنهارده مكنتش هبقي قاعدة علي المكتب و بكتب الكلام ده … كنت هفضل أصرخ في الميدان تمجيدا و تشريفا لمن رحلوا عنا … لمن سيروا أروع ما رأوا علي الارائك في جنة الفردوس .. علما بأنهم لما راحوا الجنة لم يرضوا تركنا في الجحيم … فرصفوا و مهدوا معنا أول طريق الجنة الدنياوية.

8-     عايزاه يرحل و الخبراء الدستوريين يشفولنا اي حل في أي ثغرة… تحل الأزمة و تلبي المطالب .. عفوا الأوامر فقد أنتهي عصر الأدب . ( مع احترامي الشديد للقيادات النزيهة جدا اللي بتحفر في الصخر و بتعاني علشان تعدل المايلة.)

9-     عايزاه يرحل و يسيبنا في حالنا نكمل باللي فاضل في البلد و نعمل من الطين اللي سابهولنا أبراج و مصانع و محصول قمحي قطني يستر و يكسي.

10- عايزاه يرحل و أنا بقرأ “اية الكرسي” أن أي قرار يتاخد يحفظ مصر المحفوظة المحروسة المهووسة بحب شعبها و المحظوظة بحب شعبها لها… أنا العيل الرزل و بقولك … امشي بقي

نسمة زعزوع

حتي تخرج العقدة من المنشار

 

لم أقل اننا العقدة ولا النظام هو المنشار مع انه بقاله سنين منشار محترف , كما لم أقل العكس مع اننا قمنا فعلا ببتر و نشر القطع الفاسدة او اللي ناوية علي فساد في البلد, و لكن لدي رغبة في ان أرتب بعض الأفكار و أعرضها بصوت عالي نتيجة بحث يومين في الدستور و اراء المتخصصين و سماع العقلاء و الحكماء باختلاف اراءهم  في كثير من برامج التلفزيون.

توصلت لعدة حقائق لكي تخرج تلك العقدة من ذلك المنشار:

اولا : ردا علي رحيل الرئيس بالسلامة :

أغلب المصريين علي أرض البلد دي و حتي خارجها عايزين يقولوا للرئيس مع ستين سلامة و لكن في بعض الحاجات تخلينا من وجهة نظري مضطرين نعصر علي نفسنا لمونة و نستحمله الشهور دي اولها تعديل الدستور

المادة 76 و تنص علي:

ينتخب رئيس الجمهورية عن طريق الاقتراع السرى العام المباشر ويلزم لقبول الترشيح لرئاسة الجمهورية أن يؤيد المتقدم للترشيح مائتان وخمسون عضوا على الأقل من الأعضاء المنتخبين

لمجلسى الشعب والشورى والمجالس الشعبية المحلية للمحافظات، على ألا يقل عدد المؤيدين عن 65  من أعضاء مجلس الشعب و25 من أعضاء مجلس الشورى، وعشرة أعضاء من كل مجلس شعبى محلى للمحافظة من أربع عشرة محافظة على الأقل. ويزداد عدد المؤيدين للترشيح من أعضاء كل من مجلسى الشعب والشورى ومن أعضاء المجالس الشعبية المحلية للمحافظات بما يعادل نسبة ما يطرأ من زيادة على عدد أعضاء أى من هذه المجالس. وفى جميع الأحوال لا يجوز أن يكون التأييد لأكثر من مرشح ، وينظم القانون الإجراءات الخاصة بذلك كله

ولكل حزب من الأحزاب السياسية التي مضي علي تأسيسها خمسة أعوام متصلة علي الأقل قبل إعلان

فتح باب الترشيح، واستمرت طوال هذه المدة في ممارسة نشاطها مع حصول أعضائها في آخر انتخابات.

علي نسبة(3%) علي الأقل من مجموع مقاعد المنتخبين في مجلسي الشعب والشوري، أو ما يساوي لك فى أحد المجلسين،  و أن يرشح لرئاسة الجمهورية أحد أعضاء هيئته العليا وفقا لنظامه الأساسي متي مضت علي عضويته في هذه الهيئة سنة متصلة علي الأقل.

المادة 77 و تنص علي:

مدة الرئاسة ست سنوات ميلادية تبدأ من تاريخ إعلان نتيجة الاستفتاء، ويجوز إعادة انتخاب رئيس الجمهورية لمدد اخري

المادة88 و تنص علي:

يحدد القانون الشروط الواجب توافرها فـى أعضاء مجلس الشعب، ويبين أحكام الانتخاب والاستفتاء. ويجرى الاقتراع فـى يوم واحد، وتتولى لجنة عليا تتمتع بالاستقلال والحيدة الإشراف على الانتخابات على النحو الذي ينظمه القانون,  ويبين القانون اختصاصات اللجنة وطريقة تشكيلها على أن يكون من بين أعضائها أعضاء من هيئات قضائية حاليون وسابقون. وتشكل اللجنة اللجان العامة التي تشرف على الانتخابات على مستوى الدوائر الانتخابية واللجان التي تباشر إجراءات الاقتراع ولجان الفرز ، على أن تشكل اللجان العامة من أعضاء من هيئات قضائية، وأن يتم الفرز تحت إشراف اللجان العامة، وذلك كله وفقا للقواعد والإجراءات التي يحددها القانون

اذا رحل الرئيس حالا و فوض عنه نائبه  هتواجهنا مشكلة في تعديل المواد وفق الماديتين دول

المادة82  و تنص علي :

إذا قام مانع مؤقت يحول دون مباشرة رئيس الجمهورية لاختصاصاته أناب عنه نائب رئيس الجمهورية أو رئيس مجلس الوزراء عند عدم وجود نائب لرئيس الجمهورية أو تعذر نيابته عنه. ولا يجوز لمن ينوب عن رئيس الجمهورية طلب تعديل الدستور أو حل مجلس الشعب أو مجلس الشورى أو إقالة الوزارة.

المادة و تنص 84 علي :

فـى حالة خلو منصب رئيس الجمهورية أو عجزه الدائم عن العمل يتولى الرئاسة مؤقتا رئيس مجلس الشعب، وإذا كان المجلس منحلا حل محله رئيس المحكمة الدستورية العليا، وذلك بشـرط ألا يرشـح أيهما للرئاسة، مع التقيد بالحظر المنصوص عليه فـى الفقـرة الثانية من المادة 82. ويعلن مجلس الشعب خلو منصب رئس الجمهورية ويتم اختيار رئيس الجمهورية خلال مدة لا تجاوز ستين يوما من تاريخ خلو منصب الرئاسي.

بعض الدستوريين قالوا ان ليها ثغرة بتقول انه قبل رحيل الرئيس يفوض للنائب تنفيذ مهام تعديل الدستور يعني يوكل المهام دي للنائب و بالتالي تبقي عنده صلاحية تنفيذها عند رحيله و شكرا .

لكن خلوني أقولكوا بقي انه لازم يفضل و لازم يكون موجود .. لازم … عشان يتحاكم .. ما هو كمان لازم يتحاسب مش بس الداخلية … لازم يخضع لقانون “من أين لك هذا؟!!” و نعرف فلوسه جت منين و ازاي … و اللي اتسرق من البلد هي أولي بيه .. أولي نبني بيه ..و نكمل بيه… كتير منا شاف التقارير اللي اتعملت عن ثروات أسرة الرئيس و سواء كانت حقيقية أو مجرد فلفل و شطة فالتحقيق هو اللي يبين و نشكره بقي و نكرمه قبل ما يمشي انه ادخر لينا الاموال دي كلها طول السنين اللي فاتت علشان نستعيدها …

أنا مش مع رحيله و اعطائه فرصة للهروب للاستمتاع بما أخذه وجعل الشعب المصري يشقي طوال 30 سنه عجاف.

ثانيا :ردا علي حل مجلسي الشعب و الشوري: (مجلس الحزب الوطني سابقا ان شاء الله):

احنا محتاجين ننجز و نعدل الدستور لكن عندنا مجلس فاسد أو نقدر نقول معندناش مجلس اصلا معترف به لكن قدام الدستور لدينا برلمان .

المجلس المضروب ده مش هو اللي هيعدل الدستور …لكن فيه لجنة دستورية و قضائية نزيهة هي اللي هتعدل و تصيغ الدستور … و المجلس ما هو الا بصمجي وفق التعبير اللي قيل هيوثق اللي هتقوله اللجنة الدستورية النزيهة.

و يتعرض بقي علينا علشان الاستقتاء و يبقي علي الأقل عملنا ده في الوقت الضيق و متفرقش حاليا حله من تركه فوجوده  زي عدمه.

ثالثا : ردا علي المعتقلين في الثورة اخيرا و المعتقلين سياسيا عموما:

فتم الافراج عن عدد كبير منهم  و اصدار قرار بالافراج عن الباقين و تحديد مكان أو مكتب للسؤال عن أي معتقل (المفترض تحديد المكان ده النهارده ) و بالتالي ده اثبات لحسن النية الي حد ما .. كمان خلاص كلنا لازم يبقي عندنا ثقة ان زمن زوار الفجر انتهي .. و محدش هيتسحب في الضلمة لأن البلد دلوقتي كلها نورت.

رابعا : قانون الطواريء:

رأيي الشخصي انه يمكن … و بقول يمكن … وجوده دلوقتي  و أول مره يكون ليه معني علشان شوية البلطجية و الفلتان اللي في البلد… و لو اني برضه مش مع بقاءه لأننا تعودنا علي استخدامه للقبض علي الشخص الغلط في الوقت الغلط بالتهمة الغلط … لذلك فممكن نخليه احد المطالب لكني بشوف انه مش أولويه و أعتقد انها نقطة مش هنختلف عليها كتير مع الحكومة .. اكيد في ديه هنلاقي نقطة وسط.

طيب .. اللفة و الدوخة اللي بنلفها من الاول و اللي ممكن تسموها تتضييق دي ليه بقولها و بفكر فيها معاكوا بصوت عالي … علشان الوقت … واللي هو مش حجة للمماطلة .. و لكن لأن الواقع بيقولك معندكش وقت عايزين نلحق الانتخابات اللي جاية … نفرشلها أرضية نضيفة تقام عليها دولة شفافة ..

أنا لا أدعو للثقة في الحكومة أو النظام حتي لو كانوا يتمتعوا بقدر رائع من النزاهة لأن الثقة العمياء هي اللي وصلتنا لما وصلنا له النهارده…عينينا لازم تبقي في وسط رأسنا و مفتحة علشان اللي يميل عن خياله نرجع نظبطه.

كل المسأله أن الطواريء هي حالتنا دلوقتي و التفاوض أحد سبل الوصول لحلول مقبولة ..خلونا نمشي في خطوات التعديل و لو محسيناش بالنزاهة أو ان فيه فخ بيتعملنا …نقف كلنا … فأحنا الأقوي و الأصدق و الأكثر تأثيرا ..فلازم نثق في أنفسنا و قوتنا قبل ما نثق في أي نظام .

أرجو لو أي حد عنده معلومات تانيه تنفي أو تؤكد اللي قولته يضيفها .. كلنا بنتعلم سياسة و بنفهم و نمارس حقوقنا لأول مره و لازم نضيف و نعدل لبعض.. انا مصادري كلها كلام ناس متخصصين و حكماء و نص الدستور الأصلي فقط و اللي عنده جديد و رؤية مختلفه … مكانه هنا ..و محتاجين اضافاته .

ملحوظة هامة جدا : النظام وقع خلاص

نسمة زعزوع

بوابة المنزل المهجور

يوم اخر من المهزلة ..ال ..عفوا المسخرة… و في قول اخر مؤامرة …خرج الرئيس و قال ما قال .. وافق من وافق و عارض من عارض ..هناك من كان ميتذل في تدعيمه للخطاب بشكل يثير الاشمئزاز كالذي يدعي ان مبارك “أبوهم” و “زعيمهم” و “هيبوسوا جزمته” و “حقك علينا”و “احنا اسفين” و هذه عبارات حقيقية و لم أقولها مجازا.

هؤلاء اعتبروا الرئيس هو “خالد زكي” في ” طباخ الرئيس” اللي ميعرفش حاجة و اننا كلنا ناكرين الجميل عشان اعترضنا عليه و قولنا له شكرا و قول لأ للفساد اللي خرج من تحت ايده …ايده …اللي لو كان سرق فهي أكيد ليست نظيفة … و لو كان زي ما دخل زي ما هيخرج يبقي ايده ملطخة كمان بالبطش السوداء من اثار السارقين اللي تحته و جنبه و اللي حواليه … و البطش الحمراء من دماء الناس اللي اتقتلت و اتظلمت من نظام بوليسي و حزيي أطعمه طعام كلابي فاخر  فأستفحل و أستوحش .. و لم يعد هو نفسه قادر علي ايقافه …

و لما بتكلم عن المؤيدين بتكلم عن اللي مش قابضين اللي منزلوش الشارع بحتتين جاتوه و ساندويتش بسطرمة …منهم قادة رأي  و فنانين و شباب عادي و موظف مش لاقي قوت يومه ..بس خطاب عاطفي أكله و شرب عليه شوية ميه و الحمد لله…ده غير برضه ان في منهم منتفعين بشكل او اخر.

لأ ..حقه مش علينا … هو أصلا مالوش حق..احنا اللي لينا حقوق سرقت و نهبت و اغتصبت  و اتسحبت رخصها و اضربت علي قفاها … حقوق اتعملها محاضر متلفقة و خصومات بلا معني و تحت مسميات وهمية… حقوق اخذ منها اتاوات من اصحاب اشارات المرور و حقوق وقفت في المواصلات ساعات و احتارت تكمل لاخر الشهر ازاي.. و لما فكرت تنتخب قالولها هنهينك و تتضربي.. يا تأخدي فلوس و تنتخبي …أو تقعدي في بيتك و تتكتمي.

ليس له أي حقوق فلو كان انجز ما انجزه في بداية عهده فقد دمر كل ذلك بما لا يغتفر .. و من مصلحته الا تفتح هذه السيرة… لأنها لو اتفتحت هو اللي خسران .. و لو هنحاكم و نحاسب ..يبقي مش هيخرج فعلا من البلد دي..

أما عن المعارضين  للخطاب من الشباب أو حتي المتظاهرين الشرفاء النضاف …و لم يصدقوا الخطاب و التمسوا فيه الخبث و الدهاء …أنا لا ألومهم … لدينا جميعا أزمة ثقة مع هذا النظام بطول نهر النيل من المنبع الي المصب و بوسع الصحراء الغربية و الشرقية برمالها و عواصفها .. هذه الأزمة لن يحلها في يومين الوزير أحمد شفيق برغم من اني و بشكل شخصي أصدقه , كما لن يحلها الاستجابه لبعض المطالب في هذا التوقيت لأنه اصلا مش قدام النظام حل تانيالا الاستجابة لأننا مش هنهدأ في الشوارع…الأزمة موجودة و هتفضل موجوده و بعدد سنين اللي فقدناها فيها مش هترجع الا مع  سنين ثقة قدها.

لكن زي ما في مؤيدين بيطبلوا للنظام في معارضين يمارسون هواية الصيد في أعكر مياه و أحقرها … اللي بيكذب و اللي رافض الحوار و اللي بيعتقد أو كما قيل له ان رمي الطوبة الواحدة بعشر حسنات و ان الموت دلوقتي هيبقي في سبيل الله … و اللي منهم رافعين شعار “الرئيس يرحل يرحل” ..السبب عند كل دول مش أزمة الثقة السبب هو المصلحة من استمرار الهوجة اللي البلد فيها عشان متبقاش ليها صاحب …يركب و يلحق أي حاجة في الزحمة ..

أرجع بيكوا لو كنتوا لسه أصلا معايا و ماسبتوش الصفحة … تصوري اللي من دماغي جدا و اللي ممكن يكون من خيالي لما  حدث  امبارح 2 فبراير 2011  الاتي :

الرئيس قال خطابه و أكل الكثير بالنبرة العاطفية فالناس قامت و هتفت باسمه و اتحلت أزمته و مشكلته .. مين بقي هيخبط في الحيط ؟؟!! .. أي فاسد من المحيطين حزب وطني كانوا أو رجال أعمال أو غيرهم…فهو من وجهة نظره لما الرأس الكبيرة تروح هيتشال الغطاء عنهم … و سمعنا ده في الاعلام من اشخاص و من برامج نثق بها في وقت لم يعد من السهل ان تثق بأي أحد أمام أو خلف الكاميرا مسئول كان أو قائد رأي أو حتي واحد بيفتي في الشارع …

فوفق الأسماء اللي اشير ليها بالاتهام في المنابر دي .. بعض القيادات في الحزب الغير وطني…و امبارح ذكر مباشرة و بوضوح هذا القالمقدر من عند ربنا المعروف بصفوت –و لا هو صفوه لا الشفافية ولا صدق ولا ذكاء و  حنكة – الشريف و دي برضه ما علينا…قوم ايه .. صفوت و اصحابه يستندوا الي مبدأ نيرون و يولعوها و علي و على أعدائي…أنباء عن وجبات و أموال تدفع ..و ناس متأجرة …معرفش مدي صحة ده من عدمه و هل هي مجرد هرتلة و لا ايه … بس لو مكانش صفوت هيبقي جمال أو عز أو اي حد تاني منعرفوش مش علشان هو مش فاسد بس علشان ريحتوا لم تفوح …الاكيد ان دول مش شباب 25 لا الاخلاق و لا السلوكيات و لا طرق التعامل … المشكلة هنا انهم اختلطوا بالمؤيدين اللي علي سجيتهم اتحمسوا و نزلوا بعاطفة اختلفنا أو اتفقنا  معاهم… كمان المعارضين من شباب 25 أو الشرفاء بشكل عام اختلطوا بامثال أيمن نور و اتباعهم و ما يحيطهم من روائح (مكمكمة) و تلوث مع الاخوان و جماعات اسلامية تحت الارض بما يحيطهم من ادعاءات كاذبة و غسيل قذر للمخ…

فليعذرني من كان لايزال يقرأ فمصطلحات وائل الابراشي الشهيرة لم تكن ضمن كتاباتي من قبل و لكن لا يمكن أن أرقي بالكلام مع من لا يفهمون سوي لغة النفاق و الغش و المصلحة و التلاعب …

قمة في الوضاعة و استخدام “الدعاية الرمادية” جزء كبير من الكذب مع قليل من الحقيقة فتصدق الاثنين…جزء كبير من المنافقين و الأفاقين مع قليل من الصادقين مؤيدين كانوا أو معارضين…لتعطي لك هذه الطبخة المسمومة التي لم تجعل أجفاننا تهدأ أو تنام و هي تري صورة مشوهة لانتفاضتنا الراقية الطاهرة.

سؤال اخير يراودني..يمكن يترد عليه بالوقت  و يمكن لأ .. هو ليه الرئيس ساكت عليهم … هما بالبلدي كده لو رقابيهم عليها السكاكين هيتكلموا .. و لما يتكلموا هيقولوا علي فساد مباشر من الراس الكبيره مثلا؟؟ هو لسه بيسايس فيهم ؟ … لسه بيفكر يخرج خروج الفارس؟…فارس ايه ما هو فروسيتك اللي حاولت تظهرها في خطابك الاخير خلعت عنك بعد اللي حصل امبارح و بيحصل لحد دلوقتي و ازادت من أزمة الثقة التي أصبحت بوسع القارات.

الخلاصة لو لسه فيها خلاصة لكل اللي بدأ الثورة اللي توقف عن التظاهر منهم الان و اللي لسه مكمل …محدش فينا للحظة هيحس بالذنب عن اللي عمله في يوم 25 يناير لحد النهارده .. لأن هدفنا لما قمنا و لحد دلوقتي طاهر و شريف و كان لازم كلنا نعرف ان مصر و كواليس النظام كانت كالبيت المهجور لأكثر من 3 عقود..اخذنا القرار و فتحنا الباب فطلع علينا ثعابين و عقارب زي كل قيادات الحزب الوطني اللي هو لا حزب ولا وطني ..دول مجموعة من المجرمين المتجرمين و البلطجية اللي اتخفوا في بدل و مسكوا ميكروفونات و ادمنوا جوينت السلطة و حبوب القوة … طلع علينا كمان عناكب بتغزل خيوطها من سنوات ليسهل عليها الحركة زي الاخوان المسلمين و الجماعات اللي سمت نفسها  اسلامية بشكل عام … و حتي النمل و الصراصير و غيرها من الزواحف زي أيمن نور و أمثاله من المنافقين اللي بيحشروا دماغهم يمكن يطلعوا بحاجة..ده غير الخفافيش الطائرة اللي اسمها قوي دوليه … و غيرها و غيرها …كل ده عادي متحبطوش الثورة مش هتقع و احنا غيرنا فعلا و خلاص …منتظر ايه من بيت مهجور من 30 سنه لازم يطلع منه اكتر من كده بكتير…

لكن احنا اللي قررنا نفتحه و ننضفه و نصلح الأبواب و الشبابيك علشان نقدر نعيش فيه تاني …هنطلع المراتب في الشمس و نمسح و نكنس الأرض و نرش و نبيد كل الحشارات و نعيد الزرع و الحياه لهذا البيت العريق اللي هيلمنا كلنا … لأن كل سكان البيت ده يستحقوا الحياه الكريمة و المعاملة المحترمة و العلم و التربية اللي يسلموها لولادهم من بعديهم.

البيت ده مش بيت وقف ولا بيت ورثناه و هنبيعه علشان نكسب منه قرشين و نعيش بيهم في حته أحسن … احنا معندناش غيره و هنضفه علشان ملناش مكان تاني نقدر نعيش فيه .. و أول بأول كده أي حشره هتقرب هيقفلها 85 مليون مبيد … و ربنا هيعدي الأزمة و تنتهي حملة النضافة علي خير … ربنا يحفظلنا البيت الكبير وولاده …..أمين

نداء مرة اخري : رجاء شخصي مرة اخري للمؤيدين لخطاب أول أمس ان ينسحبوا من الميدان  و يسيبوا المعارضين يعبروا عن رأيهم بحرية و هو ده اللي كنا بندور عليه كلنا … حرية الرأي و التعبير … و علشان اللي عاملين شغب من المؤيدين اللي قابضين مايلاقوش اللي يدعمهم

كمان كل اللي يختلف في الرأي مع مؤيد أو معارض بلاش ندبح في بعض احنا قوتنا في ايدينا الواحدة حتي لو اختلفنا … ايوه ده شعور أو مره نحسه لأن كلنا زمان كنا ضد الفساد عموما هما ملكوت و الشعب ملكوت تاني … دلوقتي لما نختلف عادي… خلونا نحترم بعض و نحترم مصر اللي بتتولد من جديد .. متخلوش أول كلمة تسمعها منا هي … الشتيمة.

نسمة زعزوع

 

لو فيه فرصة اتمني انكوا تتطلعوا علي الكلام ده … ممكن يفرق و لو بمعلومة

كتبه : اسلام منير

http://www.facebook.com/#!/note.php?note_id=198244533519471&id=100001593848894

رقم الحظ

قررت أن أبدأ من النهاية الي البداية….مش نهاية الثورة و الأحداث و لكن نهاية عصر كان واخدنا لنفق مظلم كلنا هنخبط جواه في بعض.. نهاية عصر كانت فيه الشرطة ارهاب و الارهاب تدين و التدين سلطة , نهاية عصر كنت بطلع فيه البطاقة و أنا خايفة لو ضابط طلبها مني مع أني لم احرر أو يحرر لي محضر من قبل… نهاية عصر لا يعترف فيه بصوت بالشعب و يعاملوا علي انهم … رقم.

رقم يتكلموا عنه في التصريحات,رقم في الاحصائيات و المؤتمرات و الاتفاقيات,رقم عبيء عليهم مش أيادي للتنمية… رقم كالذي يحصي عدد من المحاضر و المخالفات الواجب تسليمها اخر اليوم… زي رقم ضحايا العبارة و القطارات باختلاف اتجاهاتها..احنا في نظر الحكومة و النظام المصري  كنا مجرد … رقم.

هذا الرقم أصبح في أسبوع يتعمل له ألف حساب …لما قمنا كلنا و نزلنا و أعلنا للعالم التحضر و التلاحم و القوة الشعبية المصرية كل العالم عملت لينا ألف حساب و أعتبر أن أبسط حقوقنا هو الحوار…. و لما تأخر الرئيس و المسئولين في الرد بكلمة تهدينا و لم يردوا علينا كان ده برضه بمنطق الرقم…تزيد الأعداد في ثاني يوم و يقترح وزير الداخلية علي الرئاسة التعامل معانا فيأخذ الموافقة..ويتعهد العادلي بلم الليلة في 3 أيام ويوافق الرئيس و الأثنين عملوا كده برضه لأننا رقم..

ضرب.. اهانة.. سباب و شتائم.. قنابل و اختناق.. وغيرها من وسائل الاحباط التي حاولت اسكات و تخويف الرقم.. و لكن الرقم ثار أكثر و لم يهدأ و بعند الشرطة يزداد الرقم اصرارا و بسكوت الرئاسة يزداد الرقم غضبا…حتي يبدأ الرئيس في اعادة النظر في اننا (طلعنا) أرواح و بني ادمين…لأ و كمان لينا صوت ..ده الصوت كمان  مؤثر …ايه ده العالم كله واقف علي رجل و بيقولك اسمع…دول مش قلة و مش مندسة…ملهومش أي علاقة بالأحزاب و الموضوع دخل في الجد.. وينزل الجيش… فالشرطة (تتامص) تاخد علي خاطرها يعني و تروح بيوتها…وانتوا عارفين الباقي…حتي يعلن عن خروج الرئيس علي الشعب في خلال دقائق و يتأجل الخطاب 6 ساعات و يعلن ان رئيس مجلس الشعب هيلقيه عنه  و بعدين يطلع يقوله الرئيس للشعب…لا أحد يعلم في ماذا كان يفكر حين اعلن اقالة الحكومة؟!! و لا أعتقد انه كان متمسك وقتها باعتبارنا رقم.. لكنه رمي بقراره ..ضرب بس ملقاش …أكتر خطاب محبط في تاريخه ..بل تاريخنا …

و نشتعل و نزداد تمسكا بالمطالب و من غير ما أطول عليكوا باقي التفاصيل اللي في النص هتلاقوها في التوك شو و من العربية و البي بي سي تجيبوها … و لا أنصح بالجزيرة للمصريين أو اللي ماشاوفوش الميدان علي حقيقته كما لا أنصح ببرنامج 48 ساعة لأمراض الضغط و السكر و القلب و من لديهم حساسية من الاستظراف.

ماعلينا … اخيرا و بعد التفاصيل اللي شفتوها و عيشناها خرج الرئيس بخطاب تاني… و كلنا قلنا قبله ماترفعوش تطلعاتكم علشان منحبطش و احنا مش متوقعين منه الكثير …غالبا هيبقي زي اللي قبله ..

خرج الرئيس  بالخطاب و خليني أفكركوا بأبرز مطالبنا :-

-خروج و رحيل الرئيس

– حل مجلسي الشعب و الشوري

– تعديل مواد الدستور 76و77و88

غير المطالب طبعا التانية بتاعة الحد الأدني من الدخل و اقالة حبيب العدلي و غيرها من المطالب الفرعية مع انها مهمة جدا و لكنها أكيد مترتبة علب المطالب الاول , و ده غير المطلب الجديد بتاع محاكمة المسئولين في الداخلية و غيرها عن الانفلات الامني بتهمة الخيانة العظمي.

لم أكن يوما من المؤيدين النظام مبارك و لكن القدر شاء الا اري غيره رئيس … و ده سبب أدعي يخليني عايزاه يمشي و أكون جزء من الناس اللي بتقوله مع ألف سلامة..

و لكن أري و ده رأيي الشخصي و أحترم أي حد يختلف معايا و لكن أرجو ان يسمعني …أري ان الخطاب ده حط حجر الأساس لبداية عصر و حقبة جديدة يعامل فيها المواطن المصري علي انه بني ادم..مش بس كده…ده بني ادم ليه صوت و تأثير مهم و مسموع .. و مش بقول ان الحجر ده الللي حطه الرئيس علشان ماتكلونيش ..احنا الللي رسمنا البداية و احنا اللي بنبدأ البني…

لكن من وجهة نظري المكسب من 80 الي 90% مواد الدستور 76 و 77 هتتعدل و كلنا هنصوت عليها و حتي و ان غابت 88 فخلونا نتفاوض تاني عليها …هيتم الحكم في قضايا الطعن في عضويات المجلس و مع اني لم أكن أقبل سوي حل المجلس لكن خلونا نحله مع رئيس جديد في حقبة نظيفة بعد شوية شهور و حتي و ان تم التزوير في تعديل المادتين فاحنا مش ساكتين وواقفين بالمرصاد… اذا وافقنا و قبلنا بده دلوقتي بس ده مش ضعف منا .. دي ثقة و قوة … ثقة في نفسنا مش فيهم … احنا في موقف قوة.

و الرئيس راحل راحل…طلب الموت في بلده …مش متعاطفه معاه و لكن بشوف ان قبولنا بالخطاب ده هييجي علينا بمنافع كتير.

اولا : هيقفل الباب علي كتير من المتنفعين راغبي قطعة من التورتة…واللي شايف في نفسه القوة و مقومات الزعيم موعدنا بعد 7 شهور و هات معاك برنامجك الانتخابي.

2- ثانيا : هيظهر للعالم كله مدي تحضر الشعب المصري و اختلاف طبيعته في التعامل مع رئيس أو مسئول قدام لو أخطأ ينسحب من غير ما يخاف علي روحه أو يخاف من رحيله من البلد.

3- ثالثا :احنا مش فاضيين..ورانا شغل كتير أوي في الشهور اللي جايه خلينا نسيب التأييد و المعرضة و نكمل بناء لأن هو ده اللي حركنا من أول يوم 25 يناير الساعة 2 الظهر.

4- رابعا : عشان العيون الكتير اللي علي مصر و مترقبة و اللي عقلي اللي علي ادي ميعرفهاش سواء كانت أمريكا أو حماس ولا اسرائيل ولا حاجة تانية منعرفهاش متقلبناش علي بعض و تستخدمنا كعرايس ماريونت.

5-خامسا : عشان احنا مش أهلي و زمالك أو ألتراس اللي بيشجع مبارك و اللي بيشتم فيه … و ننسي اننا مصريين عدي علينا حكام لقرون العادل منهم و الطاغية و تخطينا كل دول.

و اخيرا عايزة أقول رحم الله الشهداء اللي ماتوا علشان مصر تخرج من أغلالها و علشان أهاليهم و احفاد اهاليهم يعيشو حياة كريمة.

مصر خلاص خرجت و صوتنا هز 29 محافظة ووقف 5 قارات علي رجلها مترقبة لمدة 8 أيام…

 

الرقم ضرب يا مصريين و ورقة اللوتاري كسبت…رقم الحظ 85 مليون خلونا نهدأ و نفكر و نركز … و لو لسه مخونين عشان الخطاب ناقص تفاصيل مبقولش انها مش مهمة … و لو عايزين لسه الضمان … في ايدينا أكبر ضمان … مصر خرجت … و الضمان ميدان التحرير.

ملحوظة: رجاء شخصي للمؤيدين لخطاب أمس ان ينسحبوا من الميدان  و يسيبوا المعارضين يعبروا عن رأيهم بحرية و هو ده اللي كنا بندور عليه كلنا … حرية الرأي و التعبير … و علشان اللي عاملين شغب من المؤيدين اللي قابضين مايلاقوش اللي يدعمهم…

 

نسمة زعزوع

 

 

 

عند بلا كفر

 

أمر بجانبه كل يوم…صيف شتاء لابس نفس اللبس .. يجلس بوجهه المليء بالاصرار و التحدي .. يمسك بقلمه الازرق الفرنساوي و كراسته ال28 ورقة ..يسند ظهره الي عامود النور المضروب اللي بيطلع نور برضه مضروب ينطلق علي كراسته و كتابه اللي منه بيحل الواجب , و يضع امامه مناديل للبيع دون ان يدعو احدا للشراء.

أول مره شوفته قلت ده صايع اوي..حركة جامدة و أسلوب مبتكر للشحاته .. أحط مناديل و مقولش ولا كلمة و أذاكر … كلنا هنقول يا عيني و نديله اللي فيه النصيب حتي من غير ما ناخد المناديل.. و هو لا بتاع مناديل ولا مدارس و لاغيره.

بعد كده تفكيري أتعدي الفكرة دي –اللي ممكن تكون صح جدا-و راح عند ما اذا كان الولد ده فعلا بيذاكر و بيصارع الوقت علشان يحل الواجب…  حتي لو كان ده نموذج خيالي فأنا فضلت اني أكمل مع دماغي لاخر السكة دي….

تخيلت بعد عشرين سنه الولد ده ممكن يكون فين و بيعمل ايه؟ … و بنفس روح العند و التحدي دي ممكن يبقي مين ؟

ممكن يبقي دكتور ذكي جدا و دقيق يعمل بحث في حاجة عمرنا ما أخدنا بالنا منها ..هايفة وواضحة جدا بس محدش غيره شافها و يبتكر أول علاج للسرطان من غير أي أعراض جانبية.. يوصل للنتيجه دي بالرغم من ان مئاديفة اتهرست مليون مره مش بس اتكسرت.

ممكن يكون طالب في كلية زراعة قرر يتمرد علي بعض من بها من عقول أكلها دود الأرض و أخترع سماد عضوي من طمي النيل يزود الأرض خصوبة و خير.

ممكن يكون عالم و مفكر ديني يحلل الأمور و يبسطها و يحبب الناس في الدين بعلمه و تسامحه و كاريزمته مش ينفرهم بالصوت العالي و الفلس العلمي و المتاجرة بمفهوم ديني مزيف.

ممكن حتي يكون أشطر ميكانيكي بيعالج أجدع “مرسيديس” موديل 2021 زي التوكيل و أحسن و بسمعته و ايديه اللي من دهب بيتعرض عليه العمل في التوكيل فيرفض لحبه و أختياره العمل الحر.

ممكن يكون رسام بيستخدم التوابل و الأعشاب الطبيعية لرسم لوحاته و يعمل موناليزا مصرية بطابع فلاحي فرعوني أو نحات مابينحتش تماثيل الا لمن يستحق التخليد لأعماله و سلوكه.. .بيعمل تماثيل لنماذج لازم تفضل قدامنا عشان نحس انه دايما… فيه أمل.

ممكن يكون سواق تاكسي مواعيده دايما مظبوطة و لايمكن تفتح الباب و تركب الا لما يلقي عليك السلام بابتسامة عريضة و دعوة بسيطة محبوكة القافية برغم كل المشاكل اللي عنده.

و ممكن يكون مدرب منتخب الشطرنج الللي حصل بفريقة علي أول العالم 9 مرات تلاته منهم علي التوالي أو يكون اعلامي رياضي محترف و مثقف و محترم بيصون لسانه و برنامجه بيبث مباريات الشطرنج اللي حركت الشارع كله و خلت جامعة الدول العربية و عباس العقاد يهتزوا من هتافات باسم مصر.

أو ببساطة يكون أب ربي أولاده علي أن الكلمة الطيبة و الابتسامة صدقة,ان الغش في الامتحان و اكراميات عساكر المرور خطيئة لا تغتفر,ان اتقان العمل و التوكل علي الله و الوضوح هو اللي بيجيب الحق مهما ظهر عكس كده,ان الدين معامله و سلوك و ان قيمتك مش بكم المعلومات اللي حافظها دي بمدي فهمك ليها و احترامك لأي حد بيقول عكسها, و ان وجهة نظرك عمرها ما تظهر بالصوت العالي و ان العياط مش عيب .. ده كتير أوي بيريح.

ممكن يكون سياسي زكي بس مش كداب , ناظر جاد و صارم بس مش عنيف و كئيب,عالم ذرة مش خايف علي عمره كل ما يرتقي و يتعمق في أبحاثه.

مخرج سينمائي بياخد الناس بسحر الصورة و يخليهم يفكروا من غير ما يتفلسف,أو عامل نظافة أي حاجة تحت ايده بتبرق.

الفكرة كلها أن البذرة نضيفة وأصلية,حتي لما تكبر و مهما واجه الساق بتاعها من رياح و عواصف أو حتي عوادم سيارات و زبالة و جهل و سخرية و تسفيه لأفكار فالبذرة أصلا نضيفة…

و نضافة البذرة مش بتيجي من معاه فلوس ولا معهوش,اتعلم تعليم حكومي ولا

ig

الفرق بين الولد ده و أي ولد تاني قرر انه يشم كله تحت كوبري الزمالك و الملك الصالح , الفرق بين الولد ده و أي ولد قرر أنه يضرب حشيش و بانجو و يعاكس بنات بعربيته الجديدة,الفرق بين الولد ده و أي واحد قرر يسب و يلعن في أي ظروف  سيئة حوله  و يرميها علي كلمة حظ,ان الولد ده قرر يعمل اللي بيحبه و ينجح فيه و يصر انه يعمله و يكمل فيه و هو مؤمن ان محدش غيره هيعمل ده بنفس الشكل و الجودة.

هو حب اللي عمله من صغره و عمل واجب مش فاهم لزمته ايه و اتعلم يقرأ و يكتب و نفض لمجموع الثانوية العامه لأنه هيتعلم اللي عايزه غصب عن التنسيق…لحد ما جه اليوم اللي اختار فيه هو عايز ايه..و منه بدأ نقطة انطلاقه…

احيانا في نوع من العند مبيولدش كفر .. النوع ده من العند وراه ايمان و خطة و ثقة و اصرار يوصلك لهدفك اللي كنت بتحلم بيه و ساعتها ….أكيد هتكون سعيد

نسمة زعزوع

Welcome Everybody

Welcome everyone thanks for visiting my blog and  for spending some of your time reading my words …

If you are one of  those who don’t respect the opposite side and are not ready to listen to and respect different opinions no matter how far it is from you …. it’s not your place and don’t waste your time.

Also if you are one of those who are pessimistic and are sure that we are “keda  we hanefdal keda” also it’s not your place.

for those who  decided to continue , who believe  that the start is  one active domino piece which has the guts to take the 1st step towards change without fear .. then all the pieces  follow ,change and make a difference with their taste and special tone , so welcome again and hope you enjoy reading my words ,also hope that at least one of  my sentences affect you in some way , make you think twice about something … or even just entertain you in your spare time .

Nesma Zazou

just one move can change the world